Crisi ìdrica in Baronia, su 18 addòbiu in Thiniscole promòvidu dae su Prc

Su tzìrculu Karl Marx de su Prc organizat, pro chenàbura su 18 in Thiniscole, un’addòbiu pro chistionare de sa crisi ìdrica de su territòriu narende deretu chi fiat cosa chi «l’aiant dèvidu fàghere sos sìndigos de sa zona unos cantos meses a como». Sìndigos chi, «in funtzione de su ruolu issoro ant s’autoridade» pro aprontare «una mobilitatzione». Sa diga de su Maccheronis est a su mìnimu e sas biddas interessadas ant a sufrire unu ratzionamentu (cun abba a dies bàrigas) dae su 21. Sa prataforma de s’addòbiu est chi su territòriu si mobìlitet pro chi sa Giunta regionale finàntziet deretu: sas òperas de interconnessione intre sa diga de Torpè e sa de su Tzedrinu/Pedra ‘e Othoni; su potentziamentu de sa rete esistente dae su Liscia a Monte Petrosu pro chi b’apat abba in Budune e Santu Diadoru cando su Maccheronis est in suferèntzia; s’acontzu de sas retes pro minimare sas pèrdidas nessi a su 20% dae su 50 atuale. «Sa nostra est un’assemblea aberta a totus pro una batalla chi devet èssere cumpartzida sena distintziones». S’apuntamentu est in sa sala de s’Unione de sos Comunes in carrera de Isalle a sas 6 de sero.