Ecunumia: sa Sardigna de su "Sole 24 ore" e s'Ísula chi sparafundat

Ascurta custa nova



(S’úrtima nova) – Casteddu, 16 de su mesi de fiàrgiu - Sa Sardigna impari a su Trentinu Artu Adige est sa regioni de su stadu itàlianu chi aguantat mellus a sa crisi. Aici una de is printzipalis agentzias de imprenta resumit is datus de su spricullitu fatu po su períudu 2007-2011 e publicau de su "Sole 24 ore". S'Ísula est a metadi de classífica in su raportu de su Tzentru Istudius Síntesi: in acrescimentu su númeru de is brevetus, tenit unu primu postu fintzas in sa classífica de su gradu de obertura cumerciali e una medalla de prata in s'incrinu a s'esportatzioni. Datus, is úrtimus, chentza de duda acapiaus a su fatu ca ddoi est sa Saras de Sarròccu, s'arrafineria prus manna de su Mediterràneu. Ma sa Sardigna contàt de su "Sole" est difarenti de sa chi amostant  is crònacas de sa crisi chi ligeus dógnia diri, cun su Surcis -comenti at scritu una pariga de diris fait S'"Espresso" - "provìntzia prus pobera" in assolutu.Puru su relatu Crenos de su 2011 fueddat de un'Ísula chi sparafundat: una Sardigna aundi intre su 1998 e su 2008 su réditu po dógnia conca de is sardus cabat de su 10 po centu. Una Sardigna sémpiri prus pobera in sa cali is consumus de is famílias funt abasciendi de cincu annus . E bosàterus ita ndi petzasis? Sa redatzioni de IlMinuto torrat cras cun d-un’àtera puntada de S’úrtima nova: unu progetu chi bit a su ligidori protagonista de su giornali inditendi is novas chi fueddant de Sardigna e chi po issu funt de importu mannu.

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda