Sardigna: falant sas impresas individuales

Aprofundimentu de su lunis - A pustis de pandemia e carestia in Sardigna falant sas impresas individuales, s'arriscu est mannu pro sas butegas de famìlia.

Tempu malu pro sos cummertziantes, duncas. Tra iscritziones e burradas, in su mundu de su cummèrtziu si registrat unu saldu negativu e su benidore est iscuru finas pro sos artesanos (- 648 ditas individuales e - 516 totales). Unu datu, su chi at fatu connòschere "Confesercenti", chi nos dat cunfirmat de sas dificultades semper prus mannas chi ant sas impresas minores a abarrare in pee.

"In Sardigna - comente sutalìneat su diretore de 'Confesercenti' Gian Battista Piana - tra su 2019 e su primu trimestre de su 2023 perdimus s'8,9% de sas impresas individuales in su cummèrtziu e su 2,3% in s'artesanadu. Su minimòngiu de sas impresas de famìlia est unu fenòmenu chi interessat a ambos sos setores e est unu fenòmenu difusu in totu su territòriu de s'ìsula cun diferèntzias ladinas tra una provìntzia e s'àtera".

Ma comente si podet propassare custa crisi? Pro propassare sa crisi, acrarat "Confesercenti" Sardigna, "Abisòngiant a minimare sos càrrigos burocràticos e aumentare sos agiudos" de dare a custas realidades produtivas.

Tra sas ipòtesi fatas dae su Guvernu italianu b'est sa de una revisione de sas modalidades de sa pagamenta de sas impostas. Prus a notu, s'idea de introduire pro su benidore unu tipu de abbonamentu fiscale, propassende gosi su mecanismu 'saldu-acontos' cun una derramada mensile de su chi si depet e un'agualadura finale".

No est totu. Pro "Confesercenti" Sardigna sas atividades imprenditoriales noas, pro tres annos abbisòngiant finas de una diminutzione de sos càrrigos providentziales e fiscales.

Su chi est netzessàriu est a pònnere una fiscalidade de avantàgiu pro sas butegas chi ant unu faturadu inferiore a 400milla èuros a s'annu. Custu est pro "Confesercenti" Sardigna unu provedimentu essentziale pro controire su fenòmenu de abbandonu cummertziale chi interessat siat sas biddas siat sas tzitades.