Dae "Vinodabere magazine enogastronimico" chimbe binos de Sardigna cun su puntègiu màssimu

Aprofundimentu de su chenàbura - "Vinodabere magazione enogastronomico" premiat chimbe binos de Sardigna cun su puntègiu màssimu. Cun 700 binos e prus, 329 sunt meritosos de retzensione. Capassos, duncas, de otènnere unu puntègiu a su mancu de 90/100, chi cunfirmant su livellu artu de sa produtzione sarda de binos.

Tocat a pretzisare ca 100 binos e prus ant propassadu sos 98 puntos cunsighende sa "standing ovation", est a nàrrere su reconnoschimentu màssimu. Chimbe ant otentu su puntègiu de 100/100.

Pro Maurizio Valeriani, Antonio Paolini, Alessandro Battaglia, Ruggero Faliva, Paolo Frugoni, Maurizio Gabriele, Emanuele Giannone, Luca Matarazzo, Daniele Moroni, Gianmarco Nulli Gennari, Pino Perrone, Emanuela Pistoni, Stefano Puhalovich, Franco Santini, Gianni Travaglini e Paolo Valentini, giornalistas chi ant cumpiladu sa ghia nùmeru 6 dedicada a sa Sardigna, sos binos primorosos de s'ìsula sunt: "Ruinas del fondatore 2020" de sa cantina Depperu de Luras; "Vernaccia di Oristano Riserva Per te 2002" de sa cantina Silvio Carta de Zeddiani; "Vino liquoroso rosso Festa Norìa" de sa cantina Santadi de Santadi; "Cannonau di Sardegna Brulleri Ghirada Bruncu Boeli 2021" de sa cantina Osvaldo Soddu de Mamujada; "Cannonau di Sardegna riserva Tziu Ziliu 2019" de sa Cantina Orgosa de Orgòsolo.

Tra sos obietivos de sa ghia "Vinodabere magazine enogastronimico" editzione 2024 b'at finas su de distrùere sos istereòtipos chi bivent galu in intro de su mundu enològicu sardu. Tra custos su chi interessat su Cannonau, bidu comente binu alcòlicu meda e grae, mentras oe lu agatamus in interpretamentos chi mudant dae zona a zona, totus de interessu mannu.

Sa ghia 2024 e "Vinodabere magazine enogastronomico" si podet leghere online a s'indiritzu: https://vinodabere.it/guida-ai-migliori-vini-della-sardegna-2024-di-vinodabere-la-guida-completa/