S'"Europeade" 2023 e sos primores de su territòriu nugoresu

Aprofundimentu de su chenàbura - S'"Europeade" 2023 at àpidu tra sos protagonistas suos finas sos primores de su territòriu nugoresu. Sa manifestatzione est istada acasagiada dae sa tzitade de Gotha in sa regione se su Thüringen, ma, a cantu paret, pro su 2024 si faghet un'ipòtesi interessante: si faeddat de Sardigna.

Cun sos primores agrualimentares issoro, a leare parte a sa de 58 editziones de su "Europeade Gotha", sunt istadas unas cantas aziendas de su territòriu de sa provìntzia de Nùgoro: noe in totu.

Sas aziendas nugoresas sòtzias de "Coldiretti" - si leghet in sa nova de ANSA - ant rapresentadu a manera perfeta sa Sardigna in s'editzione 2023 de "Europeade". Sa resèssida, difatis, est istada manna meda.

Un'addòbiu de chimbe dies, su chi est istadu dedicadu a sa festa europea prus importante de su folklore. Un'addòbiu cun nùmeros interessantes: si chistionat de 4 milla presèntzias e 200 grupos.

Ma torramus a faeddare de Sardigna: a fàghere lùghere su chelu tedescu sunt istadas s'azienda "Brau Farm" de Oroteddi cun su casu cosa sua, sa Cantina "Su Pranu" de Sòrgono cun su binu Mandrolisai DOC, e sa Cantina de Durgali cun su binu Vermentinu.

Presentes finas sos salumes de sa "Larderia Palitta" de Durgali, s'ògiu de sa "Cooperativa Valle del Cedrino" de Orosei, su binu Nepente de sa "Cantina Iolei" de Ulìana e su binu Cannonau DOC de sas cantinas de Mamujada "Muggittu", "Sedilesu" e "Canneddu".

Sa resèssida manna batida a domo dae sos produtos de Sardigna cunfirmat - comente sutalìneant su presidente e su diretore de "Coldiretti Nuoro-Ogliastra" - ca manifestatziones comente s'"Europeade" sunt ocasiones de importu mannu pro afortiare sa presèntzia de sos produtos sardos in sa retza cummertziale europea e mundiale.

A pustis de sa resèssida sarda si pensat giai a s'editzione imbeniente. S'ispera est sa de fàghere isbarcare "Europeade" 2024 in Sardigna, ma massimamente de la fàghere acasagiare pròpiu dae sa tzitade de Grazia Deledda, Nùgoro.