Prejos e càbuda, sa trassa de sa shrinkflation

Aprofundimentu de su mèrcuris - Li narant shrinkflation, abreviatzione de shrinkflation. Sighende sos resurtos terminològicos de àteras limbas romanzas li diamus pòdere nàrrere reduflatzione o isgrammadura. A livellu de lèssicu diamus pòdere imbetzes chistionare de imbòligu, futidura, friga, trassa, inghènia e sigamus·bi·la comente cherimus chi tantu sa limba nostra est bastante rica de sinònimos. Duncas? Est s’istrategia de sas aziendas chi non nos faghet a bìdere s’aumentu de su preju dende·nos cosa in mancu pro mèdiu de una mèngua de pesu de su chi comporamus: macarrones cun pachetes de 400 grammos imbetzes de 500, pische in iscàtula, bistocos, casu in crema, detersivos, cafè e cantu b’at. Medas bortas custas aziendas tenent unas cantas fàscias de preju bene presentadas e bene connotas (dae sos chi còmporant e dae sa cuncurrèntzia).

Duncas, cando cherent balangiare de prus lassant cussu preju o àplicant su preju de un’àtera fàscia, chi podet èssere sa prus bassa o sa prus arta, ma semper cun sa punna de bi balangiare de prus dende·nos prus pagu. Àteras bortas sunt sas promotziones multiconfetziones chi parent cosa profetosa pro nois chi comporamus, ma càpitat chi sas cunfetziones de s’oferta siant prus minores.

Posca b’amus sos produtos aprontados cun fòrmulas e ingredientes diferentes: fintzas inoghe, pro mustrare chi sas fòrfighe no est tropu manna, custos tenent pesu prus minore. E àteras tècnicas b’at pro nos dare s’idea chi semus gastende in mancu. Cheret chi denuntziemus custa pràtica, ma in su matessi tempus devimus fàghere su chi semper faghimus (o su chi semper diamus dèvere fàghere) cando seberamus produtos cun prejos e formados diferentes. Est a nàrrere dare atentzione a su preju de su produtu a su chilu o a su litru. De custa manera semus a tretu de averguare cale est su chi nos cumbenit de prus a paridade de caraterìsticas e de gustos.