Còmporas firmadas dae sa carestia de sas bulletas

Aprofundimentu de su lunis - Unu pòdiu chi non dat prègiu, su chi, in sa classìfica italiana de s'ispesa alimentare, biet sa Sardigna comente binchidora.

Firmada dae sa carestia de sas bulletas, s'ìsula est sa realidade chi còmporat de mancu. S'ispesa de sos sardos in còmporas alimentares est difatis de 400 èuros a su mese. A comunicare su datu est su "report" de "Confesercenti", s'assòtziu de categoria chi rapresentat sas impresas italianas de su cummèrtziu.

Ma comente podent torrare a "bivere" sas còmporas? A su chi nos narat s'assòtziu, sas comporas alimentares ant a pòdere torrare bìvere feti cando at a acabbare sa carestia de sas bulletas.

Ite nos faghet connòschere s'istùdiu de "Confesercenti"? S'istùdiu nos sutalìneat ca in su 2023, pro sos sardos s'ispesa mèdia mensile a famìlia est de 2.044 èuros, duncas est galu inferiore - comente pretzisat Ansa Sardigna - a sos valores de su 2019, est a nàrrere a sos valores de primu de su Covid -19 (2.158 èuros). No est totu. In su 2023, s'ispesa alimentare mèdia de sas famìlias de Sardigna a su mese at a biere feti una crèschida de su 0,8%; una crèschida, duncas, de 16,4 èuros in prus a su mese. Comente denùntziat s'assòtziu, custa est sa crèschida prus bàscia in sos tres annos chi andant dae 2021 a su 2023.

Si, comente si pensat, in su 2023 sas tarifas de lughe e gas ant a minimare de su 40%, comente at supostu su Ministru de s' "'Economia e delle Finanze" Giancarlo Giorgetti, s'ispesa cumplessiva de sas famìlias pro sa lughe e su gas - sutalìneat Confesercenti - aiat a dèpere colare dae 76 milliardos pagu prus o mancu a 45 milliardos de èuros. Est a nàrrere ca aiat dèpere calare dae 2.950 èuros a 1.780 èuros a s'annu pro famìlia.

Sas resursas liberadas, pretzisat su diretore de 'Confesercenti Sardegna', aiant a pòdere acunsentire un'atzelerdada de sos consumos de sas famìlias, cosa chi in su 2023, a dolu mannu, abarrat galu "al palo".