Durches de Pasca Manna: in Sardigna sos produtos de Pasca Manna binchent subra sa crisi

In sa Mesa - "In Sardigna sos produtos artesanos de Pasca Manna binchet subra sa crisi". A lu pretzisare est una nota de imprenta de "Confartigianato Imprese Sardegna".

Ma cumentzamus a narrere ca in Sardigna in die de oe sunt agiomai 2milla sas ofellerias chi faghent oos, columbas e durches.

A pagu dies dae sa festa de Pasca Manna, duncas, su setore artesanu de sos durches faghet sos primos bilantzos suos cun un'impunnada de sas bèndidas chi est positiva meda. Semus faeddande de sa bèndida de sas columbas, de sos oos de tziculate e peri de sos àteros produtos de Pasca Manna. Dae custa bèndida resurtat unu mercadu firmu e chi sighit sa dimanda de s'annu coladu.

Segundu su "dossier" acumpridu dae s'"Ufficio Studi di Confartigianato Imprese Sardegna", chi at analizadu sos datos de su 2021 de "UnionCamere/Infocamere", in s'ìsula sunt ativas 1.902 impresas de ofelleria e de su setore chi faghet durches artesanales: sas ofellerias artesanas sunt 1.415 e rapresentant su 74,4% de totu sas impresas.

Su resurtadu otentu dae s'ofelleria in Sardigna est bonu meda e lompet mancari sas impresas siant bivende unu perìodu de crisi malu.

"Mancari sas impresas sardas, comente finas sas italianas, siant sunfrende unu contracorpu grae pro more de sa crisi energetica – at sutalineadu Marco Rau - a banda de sos consumadores sa rechesta de durches at mantènnidu sa firmesa registrada s'annu coladu e in carchi casu tocat a notare peri una crèschida lèbia".

Duncas, su traballu de sas ofellerias sardas, nointames sos milli problemas chi devent afrontare (chi andat dae sas bulletas caras a s'aumentu de su prètziu de sas matèrias primàrgias, dae sos costos de sos trasportos a sas dificultades chi s'agatant pro reperire iscàtulas, pabiru pro imboddiare, friseteddas e totu su chi serbit pro aprontare una bèndida fata bene), at otentu s'acumpensu giustu gràtzias a s'issèberu de sos clientes. Custos ant isseberadu: preferint sa calidade artesana, est a nàrrere sa matessi calidade chi oferit a sos clientes durches traditzionales artesanos chi sunt un'ispantu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22