Su "Vecchio Forno Sunalle" in sa manifestatzione "Taste" - "Salone di Pitti Immagine"

In sa Mesa - Paris cun su pane carasadu suo su "Vecchio Forno Sunalle" movet dae Fonne e lompet a Firentze. Su marcu at a èssere uno de sos protagonistas de sa manifestatzione "Taste" - "Salone Pitti Immagine".

S'adòbiu, chi previdit 450 protagonistas, riunit sos màndigos primorosos, sos apentos de sa cultura "food" contemporànea e sos de su "kitchen lifestyle". Gosi, intre sos màndigos s'ant a agatare finas sos produtos de s'azienda sarda "Sunalle".

Sa de bìndighi editziones de "Taste" s'at a isboligare dae su 26 a su 28 de mu mese de martzu 2022, e sa fonnesa "Sunalle", cun su pane carasadu suo e paris cun s'azienda "Fratelli Pinna" de Tàtari, ant a èssere presentes in Toscana comente ùnicas aziendas sardas.

"Sunalle" rapresentat sa primu azienda sarda chi leat parte a sa manifestatzione enogastronomica de Firentze cun su pane carasadu. Pro custa realidade produtiva de Sardigna chi aunit traditzione e industrializatzione, duncas, s'adòbiu toscanu at a èssere unu momentu de visibilidade importante. "Taste", difatis, est un'ocasione pro sighire unu nùmeru mannu de reconnoschimentos internatzionales e peri un'ocasione pro àere un'ismanniada cummertziale costante.

Pro sos de "Sunalle", leare parte a "Taste" comente ambasciadores de unu tra sos produtos sardos prus famados de Sardigna est un'onore ma finas una responsabilidade manna. Lu sutalineat su responsàbile cummertziale de s'azienda Fabrizio Di Napoli, chi acrarat peri ca pro "Sunalle" sa de Firentze "est un'ocasione pro contare sos 30 annos de istòria aziendale" e finas pro ispiegare sa prospetiva innovativa e contemporànea chi caraterizat custa realidade produtiva. Faeddamus de una prospetiva chi non at ismentigadu sa traditzione.

Sa manifestatzione "Food lifestyle" at a dare a "Sunalle" s'oportunidade de presentare s'evolutzione de su pane carasu clàssicu, e in prus at a dare visibilidade a àteros produtos: sa lìnia biològica e sos produtos sena de glùtine. Su "Taste", duncas, pro s'azienda de Fonne si cunfirmat comente unu momentu importante finas pro presentare a unu pùblicu nou sos produtos chi rapresentant sas innovatziones de s'azienda.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22