Dae sa Crannatza a sa Nieddera sos binos de s'“Azienda Agricola Fattoria Didattica ʻFamiglia Orroʼ”

* Dae sa terra a sa butìllia * - Est un'azienda minoredda chi at domo in Tramatza, bidighedda in provìntzia de Aristanis. Su nùmene suo est “Azienda Agricola Fattoria Didattica ʻFamiglia Orroʼ”, una realidade interessante meda chi contat binti ètaros de terras coltivadas a bides, olia e ortalìscias.

Sos binos produtos dae sas bides pastinadas in sas bìngias de sos Orro sunt traballados in sa cantina de sa famìlia etotu. Sas produtziones sighint sas tènnicas de sa traditzione ma cojuant s'innovatzione puru. Gosi, custa realidade amparat a sa bio-diversidade e aderit a sos printzìpios de sa “massaria sostenìbile”.

Sas etichetas Orro sunt famadas in su mundu de sa produtzione vitivinìcola. Difatis ant otentu diversos prèmios e reconoschimentos.

Sas àghinas coltivadas dae s' “Azienda Agricola Fattoria Didattica ʻFamiglia Orroʼ” sunt sa Grannàtza de Aristanis, chi produit unu binu de primore nòdidu in totu su mundu, e sa Nieddera, una bide autòctona a budrone nieddu.

Naschent in custa manera sas propostas de sa Grannàtza de sa famìlia Orro. Tra custas ddoe at su binu “Tzinnigas”, unu “I.G.T Valle del Tirso” nàschidu in su 2011. Otènnidu dae àghina Grannàtza chentu pro chentu, est unu binu bonu meda a lu bufare cun màndigos de pische.

A sighire sas àteras etichetas; calicuna at nùmenes bellos aberu. Tra custas su binu “Passentzia”, una Grannatza de gustare cun casu o cun durches tìpicos sardos, e su “Karesia”, un'àteru binu durche chi est unu “Valle del Tirso IGT”, una bèvida chi pasat in carradas minores fatas cun linna de cariasa.

Tra sos biancos de Orro agatamos s'eticheta “Crannatza”, chi pasat pro duos annos in carradas de castàngia. In fines, un'àtera produtzione de primore de custa cantina estremada est sa “Vernaccia di Oristano D.O.C.”, chi afinat in carradeddas chi non si prenant a cùcuru.

Non est acabada inoghe. Sunt difatis fìgios de sa Nieddera coltivada in custa azienda su Spinarba Rosso e su Zente Arrubia, unu nieddu e unu rosadu perfetos a los bufare mandighende petza arrustu e casu istajonadu.

Tra sas ideas de sa Cantina Orro agatamos s'ampudda “Impilabile”, chi assentat, s' una asuba de s'àtera, diversas etichetas de Crannatza, e una “Grappa di Crannatza”, distilladu cun sabores aromàticos ispetziales e licanzos.