Cun Alvure unu biàgiu ispantosu intre sos sabores de sas birras màstrinas de Su Masu

* Dae sa terra a sa butìllia * – Su de Alvure est unu birrifìtziu màstrinu chi s'agatat in Su Masu e chi at unu nùmene importante. Sa terra de Sardigna, s’ischit, costoit paritzos àrbores chi sunt bellos e nodidos; calicunu intre custos at prus de milli annos. Gosi, a rapresentare su birrifìtziu Alvure est istadu isseberadu unu ghinìberu, unu de sos àrbores meravigiosos de s'ìsula nostra.

Pro sa pretzisione, sa realidade brassìcola de Su Masu est rapresentada dae su ghinìberu ruju, su matessi chi in latinu at su nùmene Juniperus oxycedrus: una mata nuscosa e forte, chi portat fragu de timàngia. In su tempus coladu, custa mata beniat impitada pro fraigare sas traes de sas domos. Oe, imbetzes, s'agatat a s'ispissu in sas coberturas de sos pinnetos.

Sos meres de Alvure, Alberto, Francesco e Mauro, ant batidu su ghinìberu ruju in intro de sa birra AltBier, una bèvida chi at sos sabores de sa terra de Sardigna. AltBier est una birra a colore de pinnadellu cun 4,9% grados de alcol, incubonada pro tempus meda e meda nuscosa, at unu sabore praghile de ghinìberu e si distinghet pro èssere un'eticheta frisca cun un'ispuma carca a tipu mantega. AltBier est una birra ùnica a beru.

In prus de s'AltBier, su birrifìtziu de Su Masu produit àteras apuddas puru,birras chi sunt una prus bona de s'àtera: sa Blanche, sa Blonde Ale e sa Ipa.

Frisca meda e cun pagu alcol (4,3%), sa Blanche est un'eticheta Alvure interessante meda. Pagu gasada e cun un'ispuma bianca, omogènea e durajola, est una birra chi bogat nuscos de limone, zènzeru e coriandru: totus ingredientes chi la faghent una bèvida ingolumadora chi nde bogat su sidis. Est perfeta pro la bufare in sas dies de basca meda.

Sa Blonde Ale est una birra in colore de oro, chi at 4,7% grados de alcol. Si caraterizat pro àere ispuma meda. S'ispuma sua est che una crema. Bonde Ale nde bogat unu sabore marigosu lene-lene e est bona pro la bufare in cale si siat momentu de sa die.

Pro chie preferit sa birra cumpata e carca, su birrifìtziu proponet sa Ipa, un'ampudda de 6,2% grados de alcol. Ipa est una birra marigosa e saborida meda, chi at nuscos de lùpulu e unu pagu de agrumes.