Su balimentu mannu de is bingias e de su binu de Sardigna

Ascurta custa nova


(S’úrtima nova) – Casteddu, 5 de su mesi de martzu - Sa risossa naturali particulari de is sarmentus de satu e is bingias aradas e is istudius in campu istóricu e archeológicu amostant su balimentu chi tenint sa bingia e su binu in Sardigna. S'est fueddau de sa cosa giai su 5 de su mesi de arbili passau in Amburgu po "Sardinia insula vini", atopu aprontau de is GAL sardus (Monti Linas, Logudoru Sa Costèra, Mari Monti e Montiferru Barigadu Sinis) e de s'Istitutu de Cultura de Amburgu, organizatzioni uficiali de su Guvernu Italianu ghiau de su Ministeru de is Esterus. S'atopu at fatu bessiri a pillu is particularidadis de is produtzioni sardas in matéria de binus. De importu mannu is arrasutaus otentus. In sa diri de istudius s'est cumprovau, difatis, ca sa Sardigna est unu primori puru in sa su traballu de sa bingia e in sa produtzioni de su binu. Ingunis, Mario Sanges, de sa Subrintendéntzia Archeológica de Tàtari e Nùgoro, at amostaru is proas istóricas e archeológicas de s'antigóriu de sa traballadura de sa bingia e de sa produtzioni de binu. Ma no est acabada innoi. Gràtzias a Gianni Lovicu, de su Dipartimentu po sa Circa de sa Coltivatzioni de is matas de s'agentzia Agris Sardigna, est stétiu postu in craru sa particulari risossa naturali de is sarmentus de satu e de is bingias traballadas in Sardigna, puru de cussas de prus pagu importu. Est cun s'iscopu de agiudai a s'avolaramentu de custa importanti risossa de sa messarítzia sarda chi s'agentzia Laore aprontat duus atopus chi tenint comenti títulu "Su traballu de sa bingia e is provas de traballadura cun interceppo". S'idea est sa de donai assistu ténnicu a custu compartu de sa messarítzia. Protagonistas is cantinas de Durgali e de Santa Maria La Palma de S'Alighera. Is duas proas dimostrativas de sa traballadura de su terrenu funt prevìdias una po su 6 de su mesi de martzu e s'àtera po su 7 de su mesi de martzu.Coru de is traballus, sa gestioni de su terrenu, sa traballadura cun interceppo in sa fila e sa netesa de su rabatzoni cun sa spollonatrice. Letzionis, in pagus fueddus, po mellorai e avalorai is produtzionis de un'ísula arrica de produtus chi faint sa difaréntzia. E bosàterus ita ndi pentzasis? Sa redatzioni de IlMinuto torrat cras cun d-un’àtera puntada de S’úrtima nova: unu progetu chi bit a su ligidori protagonista de su giornali inditendi is novas chi fueddant de Sardigna e chi po issu funt de importu mannu.

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda