Gollei Vibes, sa passigiada archeològica de Ans in Durgali

Sighint is passigiadas aprontadas dae Assemblea natzionale sarda. In programma ddoe nde at una, archeològica, a comintzu de annu gràtzias a s’ispinnu de s’Assemblea territoriale de Durgali. S’apuntamentu est pro su 4 cun “Gollei Vibes”: «Immaginade·bos – narant is organizadores - figuras geomètricas pretzisas isculpidas a altorilievo subra de sa predamolina, istruturas nuràgicas grandiosas e cumplessas, istruturas dolmènicas chi a parusu non sunt a disponimentu de su pùblicu, parte de unu patrimòniu archeològicu istraordinàriu de s'altura Gollei a Durgali». Cun is chi ddoe ant a pigare parte b’est s'archeòloga Giulia Fancello. «Amus a bisitare is altorilievos ùnicos de Sa Icu (Sas Predas Iscrittas), su Nuraghe e su bidditzolu nuràgicu Purgatòriu, e is tumbas de is Gigantes de Biristeddi». A concruos unu aperitivu cun sa mùsica de Dj Nice, afaca a un'ogiastru seculare. S’atopu est a is 9.30 me is parchègios de su giassu de Serra Òrrios (Durgali, SP38 KM 25). Sa caminada est fàtzile, cun unu dislivellu de nemmancu 20 metros. Sa bestimenta cheret còmoda e sa cuota est de 25 èuros peròmine. Pro sa prenotatzione tocat a iscrìere a is nùmeros 340 2939252 e 347 7887049.