Antibiòticos a sos animales? Petzi cando lu narat su veterinàriu

Sa Regione e s’Istitutu zooprofilàticu isperimentale de Sardigna dèdicant su mese de santandria a sa campagna de comunicatzione in contu de resistèntzia a sos antibiòticos indiritzada a sos possessores de animales de cumpangia. Su messàgiu pertocat s’impreu de custas meighinas chi, cando non giuant, podent afortire sos batèrios faghende·los prus resistentes sas bortas imbenientes. Chistione de importu ca s’antibiòticu-resistèntzia interessat tantu sa salude umana cantu su mundu animale e su vegetale, sende chi in s’ambiente in ue istamus totu est collegadu e sende chi su cuntzaetu de One Health, est a nàrrere de Salude ùnica nch’est in intro de su Pianu natzionale de cuntrastu Pncar 2022-25. Pro chi sos antibiòticos abarrent eficatzes e sos batèrios non s’afòrtient cheret chi totu sos professionistas de totu sos setores collàborent: meighina umana, veterinària, contivìgiu de s’ambiente e tzitadinos. Pro custu est pretzisu a los dare petzi cando los prescriet su veterinàriu.