Tonino Ledda e su prèmiu Otieri, sàbadu in bidda sua su cunvegnu ammentende·lu

Su Prèmiu Otieri est in caminu conca a sa de sessantaghimbe editziones. Unu traguardu istòricu pro unu intre sos prus vidanos cuncursos literàrios. Un’esperièntzia cun unu babbu chi, sàpadu su 19, in sa tzitade sua, l’ant a ammentare cun totu sos onores. “Tonino Ledda e il Premio Ozieri, un sogno lungo 70 anni” est su tìtulu de su cunvegnu organizadu dae s’assòtziu Aps in pessu fundadu chi tenet su nùmene de sa manifestatzione nàschida su 1956 e chi como est ghiada dae su fizu Vittorio.

S’at a faeddare de s’òmine e de su disizu sou chi s’est fatu realidade. Nàschidu su 1928 e mortu trintasete annos a como. Tonino Ledda fuit su creadore de su cuncursu nòdidu, artziende·nche sa poesia de meledu pròpiu in su logu chi, sessanta annos in antis, deit lughe a sa gara in versos improvisados. Semus duncas faeddende de una figura de primore de sa cultura sarda che a s’àteru otieresu mannu Antoni Cubeddu.

«Amus a faeddare de sa poesia, de su chi fiat in sos tempos colados e de sa chi est como. Amus a contare s’istòria de su prèmiu e de su chi s’assòtziu est pensende pro su benidore. Ma amus a chistionare fintzas de sa limba sarda e de s’amparu sou», afirmat su presidente de Premio Ozieri Aps Vittorio Ledda.

A s’eventu b’ant a pigare parte tres reladores de vàllia: Dino Manca, dotzente de s’Universidade de Tàtari e presidente de sa Giuria de su Prèmiu; Salvatore Tola, unu intre sos prus mannos istudiosos de literadura sarda e grandu pinna culturale de La Nuova Sardegna; Simone Pisano, dotzente de s’Universidade pro Istràngios de Siena. Sos interventos issoro los at a moderare su segretàriu de s’Aps Marco Fenudi.

No ant a mancare sas poesias de Tonino Ledda resadas dae sas boghes de Vittorio Ledda, Tetta Becciu, Pier Giuseppe Branca e Giuliano Ledda cun acumpangiamentu musicale de Giuseppe Salis.

«Totu custu – sighit a nàrrere su presidente Ledda – in intro de sa de sessantaghimbe editziones de su Prèmiu Otieri. In su cunvegnu bi sunt totu sas premissas pro chi issu etotu siat unu grandu eventu atuale e a tretu de contare a sos presentes totu sa caminera fata. Amus a rugrare s’istòria de sa poesia in Sardigna e, penso, at a èssere unu momentu de interessu mannu pro totu sos amantiosos de literadura e de limba sarda».

S’apuntamentu est a sas 17 in sa sala de sas cunferèntzias de su Tzentru culturale Santu Frantziscu. A sa matessi ora comintzat sa direta Youtube dae su canale de su prèmiu. S’eventu naschet in collaboratzione cun s’amministratzione comunale de Otieri (chi lu patrotzinat) e cun s’Istituzione San Michele.