Su contivìgiu de su terrinu in un'eventu de su Ceas Montalbo

Su Tzentru de educatzione ambientale e a sa sustenibilidade de su Monte Arvu, in collaboratzione cun su Comune de Lodè, ponet in programma pro domìniga su 13 de custu mese (dae sas 9 de mangianu in sa fratzione de Sant’Anna) s’eventu “Il Suolo: Una Risorsa da Proteggere”, progetu chi punnat a sensibilizare sos presentes a sa chistione de su consumu de su terrinu, a sas cajones e a sos remèdios possìbiles. S’eventu nch’est in intro de sa manifestatzione regionale “Ceas Aperti” chi est interessende 45 Ceas de Sardigna dae su 24 de cabudanni coladu finas a su 15 de santugaine. Su contivìgiu de su terrinu, comente si cumprendet, est su criu de s’eventu sende chi est una resursa de grandu importu pro su praneta nostru. Sa manifestatzione, chi durat finas a sas 4 de borta de die e chi, a s’indonu, est indiritzada a famìlias, mannos e minores, previdet acrarimentos de su fenòmenu (faghende connòschere a sos partetzipantes su chi determinat sa pèrdida de superfìtzies naturales e agrìculas, sas cunsighèntzias pro sa biodiversidade, su degradu de su terrinu e sa mèngua de servìtzios ecosistèmicos), atividades pràticas de campu comente sa sèmena de foràgios sardos e unu laboratòriu vivaìsticu. S'eventu est a nùmeru limitadu, duncas bi cheret sa prenotazione iscriende una mail a ceasmontalbolode@gmail.com o telefonende a su nùmeru 340 152 95666.