Ilienses, est essidu s'album issoro "Jae"

Est essidu “Jae”, su discu nou de sa croba dark-neofolk barbaritzina Ilienses. Mauro Medde e Natascia Talloru ant publicadu sete cantzones cun Hampsicora e, difatis, Jae comente inèditas. Las podimus ascurtare in su profilu issoro bandcamp. «Pèrdidos in su tempus e in s’ispàtziu indefinidu de visiones chi si manifestant in sa sacralidade primordiale issoro – narant – amus intesu s’importàntzia de torrare a chircare sas raighinas nostras. In particulare amus chircadu de cumprèndere comente sas formas chi nos cumponent sunt fintzas in sa terra, in s’abba, in su fogu, in sos isteddos e comente lompant a nois pro mèdiu de unu limbàgiu chi si podet ascurtare ma chi est mudu. Inoghe b’est sa netzessidade de agatare sa crae, sa jae de su mistèriu chi aberit ghennas cuadas».