"In dolu", una mustra in Quartùciu ammentende sos mortos in gherra

"In dolu", gasi s’intìtulat sa mustra chi inaùgurant giòbia su 31 de santugaine in sa DoMusArt de Quartùciu (in carrera de Neghelli) in contu de impòsitos, ammentos e memòrias dae su Risorgimentu a sas duas gherras mundiales. In espositzione fotografias, giornales, alabàntzias e lamentos fùnebres, pìngios de bestimenta e àteros trastes. Cuidada dae Anna Orrù cun sa collaboratzione de Cristiano Cani e Ignazio Sanna, "In dolu" cheret contare su dolore de sa pèrdida de una persone cara, mescamente in gherra. Sa mustra, intrende·bi a s’indonu, est aberta finas a sàbadu 2 de santandria dae sas 10 a sa una e dae sas 4.30 a sas 7.30 de merie. "In dolu" nch’est in intro de sa de chimbe editziones de sa manifestatzione "Identità e Valore tra passato e presente", promòvida dae s'assessoradu comunale de sa Cultura cun s’agiudu logìsticu de sa cooperativa Forma e Poesia nel Jazz e cun sa collaboratzione de sa Pro Loco tzitadina.