Sicagna, Confartigianato: «Programmare sos interventos e a isfrutare mègius sos fundos europeos»

Oriolu mannu b’at intre sos artesanos sardos pro su chi pertocat sa cumbinatzione de tempus callente, sicagna e mudòngios climàticos. Sunt prus de 6mìgia sas impresas interessadas cun 18mìgia dipendentes. Cunforma a sos analizos de s’Ufìtziu istùdios de Confartigianato Imprese Sardegna, in su territòriu de s’ìsula b’at 2.164 aziendas (1.534 artesanas), ativas in sos 10 setores manifatureris “water intensive” consumende belle su 32% de sas risorsas ìdricas sardas. semus faeddende de s’estrativu (21,7 litros pro cada èuro de produtzione bèndida), de su tèssile (20,9 litros), de sa petrolchìmica (17,5 litros), de sa farmatzèutica (14,1 litros), de sa gomma e de sas matèrias plasticas (12,4 litros), de su bidru, tzeràmica e tzimentu (11,2 litros), de su pabiru (10,1 litros) e de sos produtos in metallu (7,4 litros). In custos setores bi traballant in 9.534, 3.735 artesanos. Totu custu sena cunsiderare sos servìtzios a sa persone e sos isperdìtzios de s’abba peri sas retes. Pro Confartigianato «cheret chi si sigat a programmare sos interventos e a isfrutare mègius sos fundos europeos».