Puigdemont torrat a Catalugna, sas timòrias e sa solidariedade de Repùblica

A pustis de sete annos comente un’esiliadu, s’ex presidente de sa Generalitat Carles Puigdemont at disinnadu de torrare a Catalugna. «In custu disinnu – narant sos militantes de Repùblica – b’est sa cussèntzia de su perìgulu de s’arrestu dae parte de sas autoridades giuditziàrias chi, mancari sa lege dae pagu aprovada in contu de amnistia, sighint persighende·lu politicamente pro chistiones de dinare pùblicu e pro àere aprontadu su referendum pro s’indipendèntzia». «Su de s’autodeterminatzione – sighint – est unu diritu inalienàbile de totu sos pòpulos chi ant sa voluntade democràtica de l’esertzitare. Pro nois Puigdemont est su presidente legìtimu de sa Catalugna e, fintzas comente deputadu in càrriga de su Parlamentu catalanu, tenet diritu prenu de pòdere pigare parte a custa istitutzione. Fìamus a costàgiu su su 2021 cando l’arresteint in s’aeroportu de S’Alighera e amus àpidu su praghere de lu retzire in Aristanis gràtzias a s’eventu istitutzionale de sustegnu organizadu dae sa Corona de Logu. S’isperu est chi potzat sighire in libertade gosende·si·nde de s’agibilidade polìtica prena in rapresentàntzia de sa natzione catalana».