Pratobello 24, sighit sa regorta de firmas in Thiniscole

Sighit fintzas in Thiniscole, sena pasu, sa regorta de sas firmas pro sa lege de initziativa populare chi connoschimus comente “legge Pratobello ‘24”. Su grupu locale “Assemblea permanente” a como at aprontadu banchitos in sa bidda e in sas fratziones marinas de La Caletta e de Santa Luchia cun belle 700 firmas. «In medas intre sos butegheris – narant sos de s’assemblea -, movende dae s’idea nugoresa “cuori della città”, ant decoradu sas vetrinas issoro cun immàgines de sustegnu a sa pesada de su pòpulu sardu contra a sas multinatzionales de su sole e de su bentu. Mancari siamus lòmpidos a su tantu normativu, intentzione nostra est sa de bi la sighire cun sa regorta a tales chi non b’apat duda in sa voluntade de sos abitantes pro s’amparu de su logu issoro contra a su bisestru paesagìsticu e ambientale de sos 63 aerogeneradores in mare prevìdidos dae su progetu Tibula de J.P.Morgan».