Eventos de su Prèmiu Otieri, si comintzat cun “The Man of Trees”

Ària de festa b’at in Otieri. Non ca si nch’est acurtziende sa de su Remèdiu ebbia, ma fintzas ca in custos concruos de istiu unos cantos eventos ant a antitzipare sa de sessantaghimbe editziones de su cuncursu poèticu famadu chi leat su nùmene de sa tzitade e chi luego at a pònnere in s’albu indeoradu sou sos premiados noos de sas tres setziones bandizadas.

Su primu eventu patrotzinadu dae su Premio Ozieri di letteratura sarda Aps, chi est parte de su calendàriu de sas manifestatziones de “Estiamo in piazza 2024”, est sa projetzione de sa pellìcula “The Man of Trees” de su 2019, esèmpiu de s’impignu de s’assòtziu pro sa valorizatzione a 360 grados de s’arte e de sa cultura de sa Sardigna.

Sa pellìcula, produida dae s’assòtziu culturale Mater-ia e chi movet dae su contu “L'Homme qui plantait des arbres” de Jean Giono (essidu su 1953), l’ant a trasmìtere gioja su 5 de cabidanni a sas 8.30 de sero in piata de Pietro Micca (Le Clarisse). Su sero etotu b’at a èssere su regista Tore Manca chi, a concruos de sa visione e in pare cun sos àteros protagonistas de s’òpera, at a faeddare cun Marco Fenudi de s’Aps Premio Ozieri.

“The Man of Trees” est unu progetu tzinematogràficu e ambientale indipendente ideadu e realizadu, cun sa punna de sensibilizzare e fàghere torrare a brotare s’amore pro sa natura male tratada e abusada, pro mèdiu de una chirca artìstica nàschida dae sa voluntade de pònnere paris sos limbàgios de sa poesia, de su tzìnema, de sa pintura, de sa dantza e de sa mùsica.

Su film, in ue bi partètzipant sos atores Bruno Petretto, Giovanni Salis, Matilda Deidda e Daniela Tamponi (cun sa boghe narradora de Alessandro Pala Griesche), l’ant giradu pro intreu in Sardigna in iscenàrios particulares e logos pagu connotos.

“The Man of Trees” l’ant presentadu a livellu internatzionale in Frantza in su fèstival Solaris de Nitza su 30 de maju de su 2019 e, a livellu italianu, in su Museu Nivola de Orane su 10 de santandria de su matessi annu.

Dae tando l’ant projetadu in tzitades e fèstival italianos e internatzionales dende·li sos prèmios "Best Narrative Film" in su London Eco Film Festival de Londra, "Best Narrative Film" in su Lazio Green Film Fèstival de Sezze e "Golden Earth" in su GeoFilm Festival de Cittadella.