Su Coordinamentu: «Semus autònomos dae sos òrganos de imprenta»

Sa proposta de lege de initziativa populare contada eris in custu notitziàriu in sardu, sende chi nânt chi naschet dae Orgòsolo, gasi l’amus contada. Ma sena mentovare su giornale chi l’at publicada pro intreu e, cosa òvia, sena nemmancu bi la traduire. Amus dadu sa nova mìnima, ca cando unu giornale si nche ponet in mesu, sos àteros no est naradu chi li devant istare in fatu. Duncas nemos impedit a unu grupu editoriale de istèrrere sa longa manu sua, ma nemos òbligat a sos àteros progetos editoriales de legitimare cussu acostiamentu. Bi pensant sos movimentos, cun sa maturidade issoro, a sestare sas lìnias. E gasi at fatu su Coordinamentu de sos comitados sardos contra a s’ispeculatzione energètica, chi custu, làdinu, narat: «In riferimentu a sa nota de L’Unione Sarda, chi proponet una lege de initziativa populare, est pretzisu a nàrrere chi: su coordinamentu no at aprovadu perunu testu de proposta de lege; su coordinamentu una proposta sua l’at notificada giai dae tempus a sos òrganos de imprenta e a sas istitutziones; su coordinamentu torrat a nàrrere chi est autònomu dae cada fortza polìtica, dae sos òrganos de imprenta e dae sas àteras organizatziones sotziales, collaborende·bi cun rispetu ma abarrende distintos; su coordinamentu tenet règulas craras e trasparentes, a ladus de nemos nch’est. Sas propostas suas ant a èssere presentadas semper in forma pùblica». Faghet parte de su coordinamentu finas su comitadi orgolesu "Ventu Hontràriu" chi eris amus mentovadu.