Prèmiu Otieri, publicadu su bandu nou. Luego sos traballos de catalogatzione de totu sas òperas dae su '56

Torrat su Prèmiu Otieri, su cuncursu literàriu nòdidu nàschidu su 1956 gràtzias a s’atza de su fundadore e primu segretàriu Toninu Ledda.

Finas pro sa de sessantaghimbe editziones amus a bìdere sa fòrmula rodada de sas tres setziones dedicadas a sa paràula creativa in limba sarda, gadduresa, turritana, aligheresa e tabarchina.

Sa prima, intitulada a su linguista Antoni Sanna, est pensada pro sa “Poesia sarda” iscrita, in rima o mancu, cun argumentu lìberu (lìmite ùnicu su de sos 40 versos); sa segunda, “Prosa sarda”, chi leat su nùmene de su fundadore illustre de su Prèmiu, pertocat sos contos, non prus longos de chimbe pàginas A4 (corpus 12 e 2 tzentìmetros de oru); sa de tres, “Tra poesia e càntigu” in onore de s’improvisadore Antoni Cubeddu, est sa chi aunit sos versos a su cantu poèticu tìpicu de sa traditzione sarda («nìnnidos, atìtidos, glossas, cantadas in lira, gosos, cantones torradas, modas, modellos, mutos, repentinas etc.»). Su materiale, cunforma a sos inditos de su bandu, cheret imbiadu non prus a tardu de su 31 de maju.

In giuria su presidente Dino Manca acumpagnadu finas ocannu dae sa vitze Anna Cristina Serra e dae sos giurados Cristiano Becciu, Antonio Canalis, Duilio Caocci, Clara Farina, Attilio Mastino, Riccardo Mura, Gianbernardo Piroddi, Simone Pisano, Gabriele Tanda, Salvatore Tola.

Custas sas paràulas de su presidente de su Prèmiu, Vittorio Ledda: «Manna est s’ondra pro èssere lòmpidos a custu traguardu, e semus finamentas cuntentos de pòdere annuntziare custa abertura de sa de sessantaghimbe editziones in pare cun su comintzu de sos traballos de classificatzione e de catalogatzione de totu sas òperas de su Prèmiu, dae su ‘56 a oe. In prus de sas poesias b’amus materiale fotogràficu, lìteras, verbales e comunicatziones iscritas intre giurados, rendicontatziones. Est a nàrrere s’istòria, una fotografia de su Prèmiu chi luego at a pòdere èssere posta a disponimentu de amantiosos e chircadores».