"Feminas", duas dies in Thiniscole intre arte e meledos

Torrat in Thiniscole “Fèminas”, rassigna de arte e de meledos organizada dae Toc Toc Sardinia e dae s’assòtziu Ideas e dedicada a su mundu feminile addae de sas làcanas. S’apuntamentu est pro giòbia su 25 e chenàbura su 26 de custu mese. Su primu die, in collaboratzione cun (e in sos locales de) sa Fondazione Farris Tedde, b’at a èssere su cunvegnu “Storie di Migranti”, cun sas testimonias de chie at lassadu sa terra sua. S’addòbiu est a sas 17.30 in s’auditorium Farris Tedde de carrera de Tàtari. In cussa ocasione ant finamentas a projetare sa pellìcula “Viaggi della speranza” e a abèrrere sa mustra de s’artista Antonella Minzoni in contu de minadores. S’in cras, a sas 6 de merie in pratza de su mercadu (pratha ‘e marcatu) at a èssere sa borta de sas coghineras africanas, cubanas, dominicanas e sardas chi ant a aprontare unos cantos màndigos mustrende·nos su ponte culturale chi naschet peri sas coghinas de su mundu. Pro custu addòbiu b’at a chèrrere sa prenotatzione intro de su 17 telefonende a sos nùmeros 388 8848182, 328 9079418 e 3407192150. In programma finamentas sa premiatzione de su cuncursu fotogràficu “Donne”.