Die de sa poesia, oe sa Maratona de sos istudiantes de s'Asproni

Oe est sa die internatzionale de sa poesia, e in Nùgoro sunt sos istudiantes de su Litzeu Asproni chi la festant, resende sas poesias issoro in sa de tres maratonas poèticas. Custa esperièntzia est nàschida su 2022 comente èsitu de unu laboratòriu fatu a merie.

Su primu annu su tema fiat sa paghe (fiat in pessu comintzada sa gherra in Ucraina); s’annu a pustis sa fèmina e sos diritos suos. Ma b’at finamentas de nàrrere chi unu laboratòriu poèticu lu fadeint finas a concruos de 2019, cun su Poetry slam under 20 fatu su Note de sos Litzeos su 17 de ghennàrgiu de su 2020.

Oe, a sas 18 in Nùgoro in sos locales de s’Isre de carrera de Mereu, sa maratona tenet nuscu onìricu. “Se davvero volete sognare…”, custu est su tìtulu chi movet dae unu passàgiu de “Au bonheur des ogres” de Daniel Pennac; un’invitu indiritzadu a sos giòvanos pro chi si nd’ischident e pro chi, difatis, acumprant sos bisos issoro. Fintzas ocannu ant fatu unu laboratòriu, a merie, ghiadu dae sas professoras Elena Manni e Mariantonietta Motzo. «Sos pitzocos – leghimus in sa descritzione de s'eventu – ant a propònnere formas de drammatizatzione e leturas espressivas de testos originales istèrridos in sas atividades laboratoriales».

In prus de sos istudiantes de s’Asproni b’ant a èssere sos de su Litzeu musicale “S. Satta” pro acumpangiare sos poetas e sa cantadora Clara Farina, fintzas issa presente a carchi laboratòriu. Cuntentu mannu su dirigente iscolàsticu Prof. Antonio Fadda: «Sa Maratona poètica – narat – est oramai un’apuntamentu fissu de su Litzeu nostru. Comente iscola semus ispantados de sa partetzipatzione de sos pitzocos a sas atividades in antis e a sa rassigna a pustis. A dolu mannu nche semus in intro de unu mundu chi in custos tempos, intre pandemia, gherras e violèntzia, paret oferende oriolos ebbia. Cherimus agiudare sos giòvanos nostros pro chi bisent unu mundu diferente».

m.p.