Cras in Thiniscole s'Orcu 'e Montiarvu

Cun sa manifestatzione de cras si serrat su Carrasecare anticu thiniscolesu organizadu dae s’assòtziu S’Orcu ‘e Montiarvu in pratza de Sant’Antoni e in sas cortes Sinis-Mele. Apuntamentos dae mangianu. In programma a sas 10 “Su monte imbetza pitzinnos”, contos de vida e de traballu in su monte. A sas 2.30 de merie, un’ora a pustis de su pràndiu, sos pitzinnos si l’ant a ispassiare cun sos “jocos anticos”. Sos cumponentes de s’assòtziu s’ant a bestire e a si tintinnare sa cara dae sa 4.30 pro essire un’ora a pustis peri sas carrera de su tzentru istòricu. In su corteu sas figuras de s’Orcu, de su Guardianu, de su Tintinnatu, de su Voe Jacu e de sa Partorja. A sas 7.30 ant a torrare a projetare su metràgiu curtzu de Antoni Conzu, “S’Orcu” e in fines b’at a èssere sa chena pro totu cantos cun càntigos e ballos.

m.p.