Sa segunda autonomia de Soru

«Est tempus chi su Consìgiu regionale imbeniente, s’in casu fintzas cun su contributu de un “Consulta istatutària” rapresentativa de sos entes e de sas organizatziones presentes in sa sotziedade sarda, aprovet s’agiornamentu de s’Istatutu e nche l’imbiet a sas Càmeras pro s’aprovatzione sua». Est cun custos faeddos chi Renato Soru est promovende sa “Segunda autonomia” pro chi si chistionet, cun s’Istadu, in contu de trasferimentu de poderios noos.

Custos sos argumentos: continuidade territoriale, produtzione e distributzione de ernergia rinnovàbile, amparu ambientale e valorizatzione e gestione de sos benes culturales, istrutzione e formatzione. «Cheret chi lu fatzamus in presse si a beru cherimus acumprire a sos progetos nostros de crèschida e de isvilupu». Soru est faeddende finas de una forma noa de guvernu regionale, prus flessìbile, «ue potzant cunvìvere istruturas permanentes pro s’acumprimentu de funtziones fundamentales pro sa vida de sos tzitadinos». Ma in su post longu de su candidadu de sa coalitzione sarda (mancari Soru siat su babbu polìticu de sa Lsc e a costàgiu suo b’apat fortzas chi punnant a su bilinguismu) non si mentovat mancu una borta sa chistione de sa limba. 

m.p.