Sa morte de su segundu polu, sa mancàntzia de allegas de classe. Potere al Popolo essit a campu

Sa formatzione polìtica Potere al Popolo, chi in Itàlia est in intro de Unione Popolare cun Rifondazione comunista e chi in Sardigna fiat fraighende su “Secondo polo” semper cun su Prc ma fintzas cun iRS, ProgReS, Rossomori e Pci, est essida a campu cun unu comunicadu suo in ue narat chi «non bi l’amus a agatare un’alternativa de classe in s’ischeda eletorale». In su coro de sa nota issoro agatamus sas furriaddas chi giai in antis amus àpidu manera de contare. «A pustis de meses de allegas, in ue cada tentativu de nche tòddere cada riferimentu a sa manca de classe baliat prus de sa netzessidade de s’arresonu programmàticu, is indipendentistas ant disinnadu de lassare sa mesa pro nch’intrare a sa coalitzione padronale e leaderìstica de Renato Soru. Pro cantu criticamus custu sèberu, no est cosa chi nos ispantat. Pensamus chi b’apat prus incoerèntzia in sa risolutzione de Rifondazione, non ca in pare cun issos pigamus parte a Unione popolare ebbia, ma mescamente ca cussa alleàntzia – lassende·nche a banda fòrmulas giustificatòrias comente “desistenza” – non si podet retzire pro chistiones chi non diamus dèvere acrarire a chi si narat comunista».