Regionales, Truzzu a disponimentu pro su tzentru dereta

Sa tropa de patriotas italianos de s'articulatzione regionale de Fdi s'est dada apuntamentu eris a banda de mangianu in Casteddu in ocasione de s’annu acumpridu dae su guvernu de sa leader issoro Meloni. Cun issos sa ministra Calderone. In prus de nàrrere e de si nàrrere ite ant fatu in custos dòighi meses, sos presentes ant finamentas àpidu manera de intèndere sos fareddos de su sìndigu de Catseddu, Paolo Truzzu, chi s’est postu «a disponimentu» pro sa ghia de sa coalitzione de tzentru dereta. «Sunt faghende su nùmene meu – at naradu – e de sa cosa mi nde cuntento».

Prus de una benenditzione, imbetzes, sos faeddos de Calderone: «Su sìndigu de Cateddu tenet sas cartas in règula». Unu messàgiu craru a Solinas. Tocat de cumprèndere comente s'ant a mòvere sos tzentristas. Galu nudda (o meda, cunfroma a sa mirada) s'inchit imbetzes de su tzentru manca intre Todde (cherta dae su M5s), Milia (bidu a perra torta dae su M5s) e Soru (chi denùntziat un'iscàmbiu Piemonte-Sardigna).