Regionales, apellu de ex assessores e acadèmicos pro sas primàrias

L’ant postu a cùrrere in Change.org ponende·li a tìtulu “Per una scelta condivisa e trasparente”. Est s’apellu de s’ex presidente de sa Regione Raffaele Paci pro chi su tzentru manca sèberet su candidadu a ghia de sa coalitzione pro mèdiu de sas primàrias. Sighint sas firmas de su presidente suo de tando Francesco Pigliaru (chi no lu sebereint cun sas primàrias, nen su segundu arribadu inditeint a pustis de s’afàriu Barracciu), de sos ex assessores Paolo Maninchedda e Donatella Spano e posca de esponentes de su mundu universitàriu: Bianca Biagi, Attilio Mastino, Antonietta Mazzette e àteros. «Nois sutascritores - leghimus – pedimus a totu sos sardos chi si reconnoschent in sas culturas chi su tzentru-manca, sas fortzas e sas persones de s’autonomismu e de s’indipendentismu democràticu punnant a rapresentare, chi sa candidadura a presidente de sa Regione essat a campu cun formas craras e cumpresas e, duncas, non impostas dae acòrdios sena verìfica e dibata pùblica».