Tzentru manca e intòrrios 1 – Sardegna chiama Sardegna

Sa fòrmula in italianu “governo di scopo” l’intendimus cada borta chi in Roma faeddant de su fràigu possìbile de un’esecutivu de durada curtza, pro nche colare una fase de crisi e pro aprontare unos cantos provedimentos urgentes in antis chi sa legisladura finat (pro nàrrere, una lege eletorale noa). In Itàlia però sa forma de guvernu est parlamentare. Si in Sardigna b’at crisi de Giunta e non b’at mèdiu de la risòlvere si torrat a votare. At a èssere pro custu chi tale fòrmula b’at chie l’est presentende comente una cosa pro sa legisladura imbeniente. Sos de Sardegna chiama Sardegna – a su chi narant issos – nde sunt faghende unu cuntzetu pro chi si essat «dae sas crisis chi atraessat» s’ìsula e pro dare rispostas «a sas urgèntzias bìvidas dae su bonu de sos sardos e de sas sardas cun seriedade, visione e cuncretesa». Comente? Pedende a su tzentru manca e a su segundu polu (ambos grupos cunsiderados «non bastantes») de s’aunire: sos primos ca sunt «privos de visones trasformativas»; sos segundos ca no andant a logu «pro more de una lege eletorale antidemocràtica». Si nono su perìgulu est «chi in Sardigna bincat galu sa polìtica betza, galu peorende sa situatzione sotziale e econòmica». Chi custas cumponentes s’aunant o mancu (su Segundu polu s’at a presentare luego e a banda), Sardegna chiama Sardegna at propostu a sa mesa de sa coalitzione naschende de tzentru manca, pro no èssere prus priva de visione trasformativa e pro no èssere prus «non bastante», chimbe propostas de su movimentu (cun intro sas chimbe de làmpadas) in contu de candidaduras e mesas de iscurtu territoriales. «Intro de su 30 de cabudanni amus a averguare cantas cunditziones ant a èssere rispetadas e duncas amus a valutare».