Salude mentale, si timet su trasferimentu de su Tzentru de Igrèsias

B’at timoria chi potzant trasferire su Tzentru de salude mentale dae su Santa Barbara de Igrèsias a Carbònia. Lu dant a ischire, dae sa Rete sarda de Difesa de sa Sanidade Pùblica, Rita Melis e Claudia Zuncheddu, chi faeddant de una «partida a ping pong sena concruos bona ebbia a fàghere crèschere discumbènios e oriolos pro sos patzientes e sas famìlias issoro».

Ma no est petzi custu su problema, ca a custu, a su presente, si b’annanghet sa mancàntzia de personale pro unu servìtziu chi no interessat a Igrèsias ebbia ma finamentas a Nuxis, Narcau, Portescusi e sa giai mentovada Carbònia.«De tres psichiatras feti duos sunt sos operativos e unu est a probe de èssere giubiladu».

m.p.