Casteddu: tres mustras pro contare su paesàgiu tzitadinu

Aprofundimentu de su lunis - Ant a èssere tres sas mustras chi ant a èssere acasagiadas in su bighinadu de Casteddu de susu, in sa primu tzitade de sa Sardigna. Custos addòbios culturales ant a èssere organizados dae su DICAAR, est a nàrrere dae su "Dipartimento di Ingegneria Civile, Ambientale e Architettura" de s'Ateneu casteddaju, paris cun su MUACC (su "Museo universitario per le arti e le culture contemporanee") e cun su "Centro comunale d'Arte e Cultura il Ghetto".

Sas tres mustras ant a contare su paesàgiu tzitadinu. Gosi su 6 de su mese de cabudanni, in sos aposentos de su MUACC, in carrera Santa Croce in Casteddu, at a èssere aberta sa mustra intitulada "Paesaggi del sacro: architettura_Arte_Comunità". Sa mustra at a serrare su 27 de su mese de ledàmine e s'intrada est indonu.

Pro s'abertura de sa mustra ant a èssere presentes su Retore de s'Universidade de sos istùdios de Casteddu; su Piscamu de sa primu tzitade de Sardigna; su de Aristanis; su de Abas-Terraba; Simona Campus, chi est sa curadora de sa mustra etotu; e Giancarlo Mazzanti, giuighe de sa giuria de su "Premio Italiano di Architettura" chi pro sos annos 2020-2023 est istadu dadu a su progetu de sa crèsia de Santa Chiara de Bàini.

Semper su 6 de cabudanni, a sas 20.00, in sos aposentos dedicados a Stefano Asili, in carrera Corte d'Appello, at a èssere aberta sa mustra intitulada "Paesaggi di Margine". Sa mustra est su resurtu de sos traballos de sos istudiantes de Architetura de s'ateneu casteddaju e s'at a pòdere visitare finas a su 22 de cabudanni chi at a bènnere..

In fines, su 7 de cabudanni a sas 18.00, in su "Centro Comunale d'arte e Cultura il Ghetto" de carrera Santa Croce, at a èssere aberta sa mustra internatzionale "El equipo Mazzanti - Giocare con le pedagogie", chi at a acasagiare sos traballos de Giancarlo Mazzanti, architetu colombianu famadu in totu su mundu.