Sas cantinas sardas protagonistas de s'International Wine Expo de Chicago

Aprofundimentu de su lunis - Est in programma pro su 22 e su su 23 de su mese de ledàmine chi at a bènnere. Semus faeddende de un' addòbiu internatzionale de importu, est a nàrrere s'International Wine Expo de Chicago.

Organizada paris cun su Vinitaly, custa manifestatzione - si leghet in su giassu internet de sa Regione Autònoma de sa Sardigna - at a èssere fundamentale pro s'economia de s'ìsula. Cale est sa cajone? Simple: unas cantas cantinas sardas ant a èssere protagonistas de sa manifestatzione chi in su 2023 at a àere domo in America.

Tocat a insertare s'importàntzia de su Wine Expo de Chicago in su cuntestu de su mercadu americanu. Comente s'ischit, difatis, su de sos Americanos est unu mercadu istratègicu pro sos binos. Duncas, sa de su mese de ledàmine rapresentat una possibilidade importante pro unas cantas realidades produtivas sardas: sa de creare ligàmines cummertziales tra sas cantinas etotu e sos comporadores americanos. "Creu - at sutalineadu s'Assessora a s'Agricoltura Valeria Satta - ca custu progetu siat fundamentale pro fàghere connòschere sas realidades de primore chi in Sardigna produint binos de calidade". Custa ocasione, duncas, at a èssere importante siat pro sas cantinas chi sunt giai lòmpidas a America siat pro fàghere connòschere a sos "buyers" àteras realidades produtivas sardas.

S'Assessoradu de s'Agricoltura e Riforma agropastorale at a èssere presente in su Wine Expo de Chicago paris cun deghe cantinas sardas. Tra sos partner de s'initziativa finas sa "Camera di Commercio" italiana de su MidWest USA. Sa manifestatzione at a èssere antitzipada, su 21 de ledàmine, dae un'addòbiu chi at a inchingiare su Wine Expo de Chicago e chi at a èssere abertu feti a sos operadores cummertziales, a sos importadores e a sos distribudores de sos Istados Unidos. Pro s'initziativa internatzionale ant a lòmpere prus de treghentos comporadores.