Sardigna Natzione: «Segundu polu che a sos àteros. Pèrdidu tempus amus»

In su mentres chi Sardigna Natzione est isetende sa risposta de Renato Soru, su “consitzu” natzionale suo, mancu s’archibusada de Mastr’Ànghelu, at àpidu su tempus de s’abbojare pro iscrìere unu comunicadu de crìtica contra a sa novidade polìtica de custas oras. «Aprendimus dae s’imprenta de sa nàschida de s’autoproclamadu “segundu polu”». Sa crìtica chi si podet lèghere intre una riga e s’àtera est indiritzada non tantu a partidos internatzionalistas definidos «fortzas polìticas chi sunt funtzionales e istrumentu de s’istadu chi imponet sa dipendèntzia», ma a sos cumpatriotas de iRS, ProgReS e RossoMori. «In Serri – abboju in antis de s’assemblea de su 16 de trìulas – amus chircadu de individuare e afortiare s’atratzione gravitatzionale chi tenet unida sa galàssia indipendentista, sardista e natzionalista in gènere, ma amus pèrdidu tempus ca amus àpidu sa cunfirma chi sa gravitatzione ideològica est meda prus forte de cussa identitària e indipendentista». S’idea de Bustianu Cumpostu est sa aprontare un’àtera lista. «Si non b’amus a resèssere – narat cun passèntzia diplomàtica – amus a isetare colende in riu non sos càdaros issoro, chi sempèr e cando istimamus, ma chi sas barcas issoro torrent a dae in segus, torrent a domo, a sa Domo comuna de sos sardos».