In sa "Guida Michelin" oto ristorantes sardos noos

Aprofundimentu de su chenàbura - Oto sunt sos ristorantes sardos introduidos in sa "Guida Michelin", sa ghia ruja dedicada a su turismu e sa gastronomia, su libru sacru de sos "gourmand" de totu su mundu.

In sa "Guida Michelin" 2023, duncas, agatamus oto "new entry" de Sardigna. Duos sunt sos nùmenes de sos ristorantes de s'Alighera, est a nàrrere, su ristorante "La Saletta" e su ristorante "Musciora", in Casteddu, imbetzes, sos premiados sunt tres: su ristorante "Da Marino al St. Remy", su ristorante "Old Friend Bistrot" e su ristorante "ChiaroScuro di Marina Ravarotto". In Codaruìna su premiadu est ristorante "Mesadoria", mentras in Poltu Ridundu est su ristorante "Deste" e in Lungoni su ristorante "Millo".

Ma ite at interessadu sos ispetores chi ant promòvidu sos oto ristorantes de s'ìsula? De "La Saletta" est pràghida sa coghina de istajone, una coghina pro su prus de mare, cun issèberu tra pratos "à la carte" o menu tastos. Onni proposta est fata cun matèrias primàrgias de calidade.
Abarrende semper in s'Alighera de "Musciora" su chi at cajonadu interesse sunt sas pitantzas chi faeddant de sas traditziones isulanas e s'impreu de produtos sardos, binos incluidos.

Galu, in Casteddu binchet sa coghina de mare, mediterrànea e elegante de su ristorante "Da Marino al St. Remy", mentras de su "Old Friend Bistrot" su chi est pràghidu a sos ispetores "Michelin" est su "melting pot" culturale e gastronomicu chi caraterizat sa coghina de su "chef" Dario Torabi, fìgiu de babbu iranianu e mama piemontesa, e finas nebode giaja vèneta.

Sa coghina de su ristorante "ChiaroScuro di Marina Ravarotto" est una coghina chi abbàidat a sa traditzione, in prus de sas propostas icònicas de Sardigna sa "chef" proponet finas unu menu interessante meda, su menu "Le Radici", un'issèberu de bator pitantzas chi faghent iscobèrrere sos sabores de Sardigna a chie las tastat.
In Codaruina pro chie issèberat su ristorante "Mesadoria" su consìgiu est su de tastare sas retzetas de mare e sos durches licanzos.

In fines bi sunt sos duos gadduresos, su ristorante "Deste" de Poetu Redundu in ue si podent mandigare pratos modernos cun un'interessante alternàntzia terra mare, de interessu finas s'alternativa a sa carta de sos binos cun su Tè e kombucha e cun su gin produidu dae su mere.
Cun sos pratos suos chi ant nuscu de mare, concruit sa lista de sos oto su ristorante "Millo" de Lungoni, un'àtera prenda gastronomica de non perdere.