Sas bator cannacas de Francesca Bellu

Aprofundimentu de su lunis - Lompent a Parigi sas bator cannacas de s'artista de Luras Francesca Bellu. Sas de sa Bellu sunt prendas chi ammentant cultura e s'istòria de Sardigna. Cannacas e bratzales de pane pintadu, ricamos e decoratziones de prellas, pedrigheddas, brocadu, velludu e trinas chi ant un'istile pomposu. Onni prenda est una prus bella de s'atera.

Sas prendas Bolu, Beranu, Adelasia e Re Renzo faghent parte de sa colletzione "paneoro".

Bolu, Beranu, Adelasia e Re Renzo, duncas, ant a èssere in sa mustra de Parigi "Paris prix - premio Parigi”, chi s'at a isboligare dae se 25 a su 30 de de su mese de trìulas in su “MMM - Miit Museum Marais”.

Sunt bator cannacas chi faeddant de Sardigna. Bolu, su pane chi si mudat in coraddu, ammentat a su mare e a sa profundidade sua; Beranu, imbetzes, torrat onore a s'ischidada de sa natura; Adelasia cheret alabare a sa judichissa Adelasia, s'ùrtima judichissa de Torres; Re Enzo a su rei de Torres e Gaddura.

"Est unu cuntentu mannu su de pòdere batire in sa capitale frantzesa unu bìculu de Sardigna” - pretzisat a ANSA Francesca Bellu, e sighit: “e de fàghere connòschere sa cultura nostra, sa bellesa e sa richesa de sos colores, de sas formas de sos bestires e sas prendas traditzionales, chi apo torradu a fàghere cun unu materiale nòbile e ricu de significados, est a nàrrere su pane, sìmbolu de bona aura e de renàschida, presente in Sardigna in totus sas festas printzipales”.

Ma dae ue naschent sas prendas de Bellu? Naschent dae su libru de Bachisio Bandinu "L'amore del figlio meraviglioso". "Sas pàginas de custu romanzu m'ant dadu s'idea giusta pro creare sas prendas de pane, unu ammentu a sas traditziones de sa terra mea e de s'infàntzia mea. In dae in antis apo sa figura de giaja mea chi faghiat su pane tìpicu de Luras, su pane a melas, e sa de tzias meas ingimiriadas in su ricamu” - e sutalineat - “Cando fiu minoredda, in dae in antis a cuddos chimbe panes chi dant vida a una corona, immaginaia sas festas bellas de bidda e su movimentu de su ballu tundu”.

Sunt sas fantasias de una pitzinna sas chi ant leadu forma in sas creatziones artisticas de Francesca Bellu. Creatziones chi ant sa punna de conchistare Parigi.