Regionales. Sa lista de sos sìndigos?

«Su sistema polìticu – nânt chi – no est rapresentativu». E narant puru chi non sunt «de dereta, nen de manca». Ma si nche setzent a inghìriu de sa mesa de su campu largu sardu «in manera làica iscurtende». De ite semus faeddende? De una lista de sos sìndigos, cun tantu de fàscia tricolore in su sìmbulu eletorale de “Orizzonte Comune” (a beru paret su nùmene de una cale si siat lista tzìvica). L’ant presentada eris in Casteddu s’ex cussigeri regionale e ex sìndigu de Casteddu de Anglona (e ex leader de sa lista "Sardegna civica" de su 2019 pro Solinas presidente), Marzia Cilloccu, cussigera comunale de su cabu de logu, e Carla Medau, ex sìndiga de Pula. «Oe su raportu diretu e de cunfiantza intre eletore e eletu bi l’amus a livellu comunale ebbia ue sos tzitadinos sunt prus protagonistas». Una dimanda. Comente si formant sas listas in sos Comunes? Un’àtera. Cantu gente b’andat a sos Cussìgios comunales? Un’àtera galu. Cale prataforma polìtica sistèmica (un'orizonte comune) at aunidu sos sìndigos pro una batalla generale? Sa de polìtica energètica contra a sos megaparcos eòlicos? Àteras? Faeddemus·nde.