In Bànari torrant a festare sa chibudda dorada

Lada, dorada, nuscosa e durche: sa chibudda de Bànari est pronta pro èssere festada. Pro su 22 de trìulas, sa Pro loco de sa bidda de tiu Barore Sassu (unu intre sos prus poetas mannos de traditzione orale in Sardigna) est aprontende una die de atopos culturales e culinàrios.

Custa variedade est prantada in sos sartos de sa bidda pronta pro èssere regorta in custu mese de s’annu a pustis de unu protzessu bastante longu: semenada in argiola colada sa metade de austu (su 9, su 10 e s’11 sa bidda si mudat a festa pro onorare su patronu suo, Larentu), est tramudada a sa terra unas 60 dies a pustis. Una borta collida, issa nche lompet a unu pesu intre sos 400 grammos e su chilu, pronta pro èssere impreada in coghina de milli maneras: comente cundimentu o comente pratu ùnicu.

Prus chi non saborida sa chibudda intrea cota in su furru. Ma issa est bastante durche chi podet èssere impreada crua pro cundire s’insalada. Sa bidda sua, Bànari, in su Meilogu, est dae tempus chi est dende valore a su produtu suo pro mèdiu de festas e rassignas.

Ma ite est chi faghet de custa variedade de allium cepa una chibudda a banda dae sas àteras? Pro primu cosa su patrimòniu genèticu de su sèmene tramandadu dae sèculos, dae generatziones de massajos. Posca b’at de pigare in cunsideru sa calidade de su terrinu de sos padros banaresos, ricos de luzana.

In su situ trìlìngue (italianu, inglesu e sardu) su programma intreu.