Sos giornales de oe #054

Bonas dies. Sa noa chi torrat a nou comente sessat de pròere giai la connoschimus. Nos la presentat sa Nuova Sardegna narende chi b’at mènguas mannas in «su bonu de sos lagos artifitziales de s’ìsula, 38 in totu, chi frunint belle su 60% de s’abba impreada peri sas domos e sos sartos». Sa previsione: «Tempos de sicagna perlongados che a su chi amus àpidu intre s’ierru e su beranu diat pòdere àere cunsighèntzias mannas». Naramus chi non b’at nudda de nou, gasi comente non sunt noas sas «pèrdidas mannas» in sos tubos chi nche giughent s’abba a sas iscetas. No est neghe de s’imprenta, pro caridade. Antis, est mègius chi nos l’ammentet finamentas cando non ruet sa Die mundiale de s’abba. Ma at a èssere custu unu tema de disafiu polìticu cun sas Regionales acurtziende·si·nche?

Ca a su presente si faeddat ebbia de istàdiu e ospidale. Tzertu, cras sos giornales no ant faeddare de s’aprovatzione o mancu de duas motzione consiliares contra a sa delìbera de su prumu de làmpadas (s’assemblea non s’at a riunire, eris non b’at àpidu addòbiu de majoria chi abarrat partzida), ma una cosa chi agatamus in s’Unione cheret chi nos pòngiat a meledare siamus de acordu o nono cun su sèberu de nde fraigare – como e gasi comente cherent fàghere – bator noos.

In contu de sos de Casteddu e de su Sulcis faeddat sa diretora generale de Ares Annamaria Tomasella: «S’azienda at retzidu dae sa Regione s’incàrrigu de predispònnere duos istùdios de fatibilidade pro su fràigu de sos presìdios noos. Pro custu est netzessàriu a cunfrontare sos bisòngios de sos territòrios cun s’oferta sanitària atuale. Est un’anàlisi cumplessa chi meresset cumpetèntzias ispetzialìsticas mannas pro pòdere rilevare e elaborare totu sos paràmetros netzessàrios pro acumprire a un’istùdiu deghile pro l’intregare a pustis a su detzisore polìticu, pro chi fatzat sos mègius sèberos pro sos bisòngios de sa gente».

Giustu est a nos pregontare si custa cosa cheriat fata a primu? Forsis a como aìamus àpidu una delìbera cun totu cussos puntos (“averguados sos bisòngios de sos territòrios...”; “bidos sos paràmetros...” etc...) in antis de su dispositivu finale. Imbetzes nono, sa majoria si partzit a pustis de àere deliberadu. Chie bi las faghet duas dimandas a sos assessores de Forza Italia e de Fdi pro su chi pertocat sa delìbera 19/82 de su primu de làmpadas?