Sos giornales de oe #050

Annùntzios de basca a banda, sos giornales de oe nos oferint unu collegamentu Casteddu-Bànari. Movende dae sa tzitade b’amus sa fotonotitzia de “Claudio Felice”, est a nàrrere su savoia de pratza de Yenne. L’Unione sarda prus a fundu ponet su cummentu de una firma sua chi in Casteddu abarrat ma chi faeddat de sa chistione ospidales chi amus bidu sas dies coladas. E de s’istàdiu. E duncas de sa cuntierra Truzzu Solinas. Ma sigomente a sos ospidales bi devimus andare in vetura (o cun s’ambulàntzia) e non cun s’elicòteru, acò La Nuova Sardegna chi nos presentat su contu de sas istradas de arrangiare. Leghimus chi «su 2021 su ministru Giovannini aiat nominadu a su guvernadore Solinas comente cummissàriu istraordinàriu pro 10 òperas de acumprire in s’ìsula. Pro como abarrat s’annùntziu de su cumpletamentu de sa Tàtari – S’Alighera pro su 2027». E semper sa Nuova nos contat de sa Bànari-Sìligo, cun su ponte de su riu Banzos rutu e cun sa bidda de tiu Barore Sassu galu isulada mancari apant comintzadu a bi traballare. In cue s’elicotèru a mala gana l’ant dèvidu mutire pro unu tziu otantenne de nche lu giùghere a s’ospidale de Tàtari. E, a propòsitu de elicòteros, narat su sìndigu banaresu (movende dae su sucursu de sas dies coladas) chi a custu problema si bi nch’agiunghet su de sos fogos istiales. «Custu nos ponet oriolu mannu – narat –. Pro custu nos auguramus chi sos traballos finant a lestru».

Sa chistione Truzzu Solinas no est cosa chi prenat sas primas pàginas de sos giornales italianos. In cue, male male, sa chistione est sa de su Pd e de sos dem contra a Schlein a pustis de sa manifestatzione M5S de sàbadu.