Limbas de minoria, publicadu s'avisu TuLiS

Aprofundimentu de su mèrcuris - Sa diretzione generale regionale de sos Benes culturales, informatzione, ispetàculu e isport at publicadu s’avisu TuLiS (tutela de sas limbas sardas) pro s’annualidade 2023. E cun sa punna de amparare e avalorare sas limbas de minoria faeddadas in Sardigna (sardu e alloglotas), sa regione at istabilidu s’entidade de sos finantziamentos (unu millione, 345mìgia èuros e barda) pro sos isportellos linguìsticos, sa formatzione linguìstica e sa toponomàstica.

Ant a pòdere presentare sa dimanda sos Entes locales, Càmeras de cummèrtziu e Aziendas sanitàrias. Sos entes proponentes ant a pòdere presentare dimanda in forma sìngula o agregada semper chi su progetu pertochet una populatzione cumplessiva de nessi 5mìgia abitantes. Sos entes chi s’agregant cun àteros, no ant a pòdere aderire a un’àtera unione, nen presentare àteros progetos in forma sìngula.

Sas risorsas sunt partzidas de custa manera: 999.024,21 èuros de fundos istatales pro sa limba sarda e 46.080,60 èuros (semper istatales) pro su catalanu de S’Alighera; 300mìgia èuros sos fundos regionales de impreare cun prioridade in favore de gadduresu, tataresu e tabarchinu.

Sos isportellos ant a dèvere ofèrrere servìtzios a sos tzitadinos chi cherent impreare sa limba tutelada in sos raportos cun sa Pùblica amministratzione e in sos àteros cuntestos (esertzìtzios pùblicos, atividades produtivas, cummèrtziu, iscola, assòtzios, sanidade etc.).

Sos operadores, in su mentres chi sa Regione acumprat a àteras tres sessiones de tzertificatzione linguìstica C1, ant a dèvere àere unu livellu avantzadu de connoschèntzia, esperièntzia, padronàntzia e cumpetèntzia linguìstica in s’orale e in s’iscritu.

Sas propostas de Entes locales, Càmeras de cummèrtziu e Aziendas sanitàrias ant a dèvere èssere imbiadas via pec (pi.cultura.sarda@pec.regione.sardegna.it) intro e non prus a tardu de mesudie de su 26 de trìulas de ocannu.