Dae Thiniscole sa tecnologia pro sarvare sos animales in tretos de sas istradas

Aprofundimentu de su mèrcuris - We save wild animals est su tìtulu de unu progetu innovativu isvilupadu dae unos cantos istudiantes de su Litzeu Pira de Thiniscole (de una de chimbe classes) chi, movende dae s’impreu de sas tecnologias noas, punnat a sa seguresa de porcabros, de groddes e de cale si siat àteru animale agreste in cherta de traessare sas istradas. Ma finamentas a sa de chie las cursat in màchina pro nche lòmpere a aterue pro traballu o pro cale si siat àteru motivu.

Comente? Unos cantos dispositivos aplicados in sas barreras guardrail, cando chi est colende una vetura, emitent ultrasonos chi assuconant s’animale cumbinchende·lu a si nch’istare a tesu dae sa carregiada.

Sonos chi nois cristianos no intendimus ma chi in sas origras issoro parent tzocos de marteddu contra a su guardrail matessi. B’at prus livellos de interatzione, duncas. Sa de sa vetura cun su dispositivu, sa de su dispositivu cun sos animales. E non custas duas ebbia. Ca su sistema, aprontadu in pare cun un’azienda chi isvilupat brevetos, est capatze, annanghende·bi mòdulos agiuntivos, de mandare signales a àteros automobilistas s’in casu b’apat intzidente in cussos tretos. Comente? Pro more de bandas luminosas e totu in interatzione gràtzias a una prataforma aprontada pro mèdiu de estensiones Iot (Internet of things).

Su progetu, in prus de mustrare sas connoschèntzias de sos pitzocos aplicadas a fainas de grandu agiudu, si presentat comente unu mèdiu de cunvivèntzia intre animales e automobilistas sena nche fèrrere a àteras “solutziones” estremas (sas fusiladas).

Sas istatìsticas de sos intzidentes cajonados dae sos animales agiudant a sos de sa tesi de su corfu de balla. Ma custas ideas essidas dae iscola narant chi si podet fàghere sìntesi pro mèdiu de sa tecnologia. Cuntentos sos pitzocos pro una faina che a custa e cuntentos sos dirigentes de su Pira chi, pro lu pòdere isvilupare ant àpidu s’agiude de sa Fondazione di Sardegna e de sa cooperativa sotziale Lariso de Nùgoro.