Astoritu sarbadu dae sa Guàrdia Forestale

Aprofundimentu de su lunis - Sa Guàrdia Forestale at sarbadu dae una morte segura un'astoritu chi non arrenescaiat prus a bolare.
Su pugione autzu, chi apartenet a sa famìlia de sos "Falconidi", est istadu agatadu in localidade Obieddu, in sos sartos de Mragaxori, una bidda chi s'agatat in provìntzia de Aristanis. A sarbare a s'astoritu sunt istados sos agentes de s'istatzione forestale de Abas. Sos agentes ant traballadu cun s'agiudu de sos allevadores de su territòriu.

Si no fiat istadu pro sa Forestale s'astoritu arriscat de si nche mòrrere de fàmene e de sìtiu.

Sos agentes chi lu ant sarbadu, a pustis de s'operatzione de recùperu, lu ant carradu cun apretu a sa clìnica de Aristanis "Duemari", sa matessi clìnica chi in su 2016 at sarbadu a sa cane Palla e chi at fatu nàschere "Effetto Palla", una onlus de cura dedicada a sos animales chi no ant fortuna.

In sa clìnica "Duemari" s'astoritu at a èssere curadu e nudrigadu a manera adecuada.

Dae una primu bìsita, difatis, su pugione autzu est resurtadu sena de fertas e de truncamentos, ma pro more no àere àpidu unu nudriamentu adeguadu est resurtadu dèbile meda. Cando at a èssere sanadu, s'astoritu at a èssere torradu a giùghere in s'ambiente naturale suo, comente devet èssere.

Ammentamus ca s'astoritu est una ratza de pugione amparadu dae sa lee n. 157 de s'11 de su mese de freàrgiu de su 1992 in subra de sa cassa". Sa lee pretzisat ca: "In totu su territòriu natzionale est vietada onni forma de mortòrgiu de pugiones e de tentura de pugiones e de mammìferos agrestes, e finas sa leadura de oos, nios e de sos animales nàschidos dae pagu tempus". No est totu, custu pugione autzu est amparadu finas dae sa Cunventzione de Washington (CITES), una cunventzione internatzionale in subra de su cummèrtziu internatzionale de sas ratzas de fàuna e de flora agrestes minetzadas de estintzione.