Cuncursu de prosa "Màuru Deledda" 2023: duos sos romanzos binchidores

Aprofundimentu de su lunis - Su Comitadu organizadore de su cuncursu de prosa "Màuru Deledda", chi est istadu fundadore, in su 1979, de su Prèmiu Casteddu de sa Fae, e chi est formadu dae sa Famìlia de Màuru Deledda, dae sos amigos suos, dae sa Sotziedade pro sa Limba Sarda e dae Papiros Editziones, su 18 de abrile de su 2023 at publicadu su resurtadu de su Cuncursu pro s’editzione 2023 - Setzione ùnica - Romanzu in Limba Sarda.

Cunforma a su pàrrere de sa Giuria, formada dae Duìliu Caocci, Professore de Literadura Sarda in s’Universidade de sos Istùdios de Casteddu, dae Elene Casu, Professora de matèrias literàrias in Tàtari, dae Diegu Corràine, istudiosu de limba sarda, dae Crara Farina, atora e iscritora, dae Giuanne Luisu Stochino, Professore de matèrias literàrias in Casteddu, pro s' Editzione 2023 sunt istados declarados binchidores in paridade sos romanzos “Badde Tèrrina” de Italo Deledda e “Bratzos pro carvone” de Franca Pirisi.

Cunforma a su Bandu, sos prèmios pro sas prosas binchidoras sunt: s’editzione de s’òpera premiada in unu libru publicadu dae sa sotziedade editoriale Papiros a contu de su Comitadu organizadore "Cuncursu Màuru Deledda" (Papiros at a èssere titulare de sos deretos literàrios pro tres annos dae sa data de publicatzione); 30 còpias de su libru imprentadu e su diploma de su Cuncursu de Prosa in Sardu "Màuru Deledda".

In s’editzione 2023, duncas, sas òperas chi ant a èssere publicadas ant a èssere duas, e, cunforma a sas règulas istabilidas, ant a èssere iscritas sighende sas normas linguìsticas de referèntzia de sa RAS (Delìbera Giunta Regionale n. 16/14 de su 18-4-2006 "Limba Sarda Comuna"). De acordu cun s’autore, su comitadu organizadore e sa SLS/Sotziedade pro sa Limba Sarda ant a sistematizare sas òperas binchidoras chi non sunt iscritas in manera normativa pro su chi atenet su testu e sa grafia de sas òperas premiadas.

Tocat finas a pretzisare ca sas òperas premiadas ant a èssere publicadas petzi in limba sarda e ca sos libros premiados ant a èssere presentados, a pustis de s'òpera de revisione e de s’imprenta in forma de libru, in Nùgoro e in Tàtari, in ue istant sos autores.