Promotzionare su marcu "Prodotto di montagna": unos cantos addòbios aprontados dae "Laore Sardegna"

Aprofundimentu de su chenàbura - S'idea est interessante meda e movet dae unu pensu: tra sos produtos sardos, in s'ìsula est netzessàriu valorizare comente si devet finas sos produtos de monte. Produtos bonos e chi costoint sas caraterìsticas issoro.

Sa dimanda naschet de sei: comente si podet fàghere? S'"Agenzia Laore Sardegna", chi, l'ammentamus, est s'ente regionale pro s'atuatzione de sos programmas regionales in su campu de sa massaria e promovet s'isvilupu de sos territòrios e sas produtziones de calidade arta, est aprontende unos cantos addòbios. Custos addòbios naschent cun sa punna de chistionare e cumprèndere paris a sos produtores cales sunt sas possibilidades chi naschent dae s'impreu de su marcu  "Prodotto di montagna", un'eticheta chi devet distìnghere sos produtos de monte e massimamente unu marcu chi at s'obietivu de valorizare custas produtziones.

Tocat a sutalineare ca su marcu "Prodotto di montagna" est un'indicatzione de calidade, un'indicatzione lìbera e de orìgine comunitària. Ma cale est s'obietivu de custu marcu? Su de reconnòschere sos produtos de monte comente produtos tìpicos chi ant sas caraterìsticas issoro.

Podent impreare su marcu "Prodotto di montagna" sos produtores primàrgios, e finas sos trasformadores, sos distribudores e sos intermediàrios. Pro impreare su marcu, però, tocat a fàghere una dimanda ufitziale.

No est totu. Bisòngiat a agiùnghere finas ca sas produtziones chi podent àere cust'indicatzione devent lòmpere dae sas regiones chi s'agatant in s'elencu de sas zonas de monte declaradas "disvantagiadas" ("Elenco delle zone montane svantaggiate").

Sos addòbios, chi ant a cumentzare su 23 de freàrgiu dae Serdiana, naschent pro acrarire a sos produtores comente fàghere sa dimanda chi est netzessària pro s'impreu de su marcu e finas sas cunditziones chi sunt istadas aprovadas cun delìbera de Giunta 9/8 de su 5 de martzu de su 2020.

Pro sa lista de sos addòbios si podet lèghere inoghe.