Egas, 2 milliones de agiudos cun su Bonus ìdricu integrativu 2023
Est comintzada su primu de freàrgiu sa campagna “Bonus Idrico Integrativo 2023” de s’Ente de guvernu de s’Àmbitu de sa Sardigna in contu de abba e de agiudos pro su pagamentu de sa bulleta Abbanoa. Su contributu est pro chie bivet in cunditziones de disamparu (pro chie est “in bulleta”) e b’at tempus finas a su 30 de maju pro lu pedire (cun Isee non prus artu de sos 20mìgia èuros e fintzas si s’utente est benefitziàriu de su bonus ìdricu Arera).
Pro custa annualidade 2023 Egas at destinadu a custu Bonus ìdricu integrativu sa summa de duos milliones de èuros partzende·la in sos Comunes gestidos dae Abbanoa cunforma a su nùmeru de sos abitantes e a sa mannària de su territòriu.
Duas sas lìnias de interventu: sos chi non lompent a 9mìgia èuros de Isee ant a pòdere retzire unu contributu de 25 èuros pro cada cumponente de su nùcleu familiare; 20 èuros cun Isee intre sos 9 e sos 20mìgia.
M.P.