Brasile, assàchiu reatzionàriu a sos palatzos de su poderiu

Duos annos a pustis, trighende de una pariga de dies, sa dereta americana torrat a assachiare sos palatzos de su poderiu. Su 2021 in su nord fiat sa borta de sos trumpianos in Washington; ocannu in su sud est tocadu a sos bolsonaristas in Brasilia. Sa cajone est sa matessi, est a nàrrere sa de non chèrrere reconnòschere sa derrota eletorale e sa vitòria de Biden tando e de Lula como.

Su presidente brasilianu at cundennadu s'assàchiu «vàndalu e fascista» in su “Planalto”, in ue bi sunt sa residèntzia presidentziale, su Parlamentu e sa Corte suprema. Abbolotu finamentas in sa sede de su Tribunale eletorale. «Totus sos responsàbiles los amus a individuare e giuigare», at annantu Lula valutende s’impreu de s’esèrtzitu. «Custa gente devet èssere punida in manera esemplare e cun totu sa fortza de sa lege». In su mentres, Bolsonaro si nch’agatat in Flòrida.

M.P.