Amparu de s’ambiente o polìgonos militares? Sàbadu addòbiu in Casteddu

Italia Nostra Sardegna, Cagliari Social Forum, USB Sardegna, Cobas Cagliari e Madri contro la repressione organizant custu sàbadu, in Casteddu, un’addòbiu / cunferèntzia imprenta pro chistionare de annestru bèllicu e de bonìficas in sa penìsula Delta de Cabu Teulada ponende sa pregonta “Amparu de s’ambiente o polìgonos militares?”. «In sa penìsula Delta, in 70 annos de bombardamentos – narant sos organizadores –, b’at boladu milliones de ballas, mìssiles e coetes a su puntu de la decrarare non bonificàbile e interdeta a sos militares matessi. Sos bombardamentos sunt sessados petzi su 2017 a pustis de s'inchiesta de sa Procura de Casteddu e de s'imputatzione de sos vèrtitzes militares pro disastru ambientale provocadu. Su 15 de nadale coladu s'amministratzione de sa Defensa at propostu una Valutatzione de intzidèntzia ambientale pro una “bonìfica” finalizada a craru a sa ripresa de sos bombardamentos in s'àrea». Sa punna est sa de unu pianu de bonìfica reale pro chi non torrent a comintzare s’annestru bèllicu firmadu 6 annos a como. S’apuntamentu est a sas 10 in sa Mediateca de su Mediterràneu in carrera de Mameli 164.

M.P.